Lyrics of 'Transit' by Querschläger

der höchste wert in europa
ist die freiheit es zählt hålt nix mehr
und die höchste form va da freiheit des is
die freiheit für n güterverkehr
und so führ ma des glump umanånda
insa zaubawort des hoaßt transit
mir führn jedn schoas wånns sei muaß in kroas
und des gånze bringt a no profit
transit transit
då tean ma mit
weil tean ma nid mit
håbn ma schnell
insan EU kredit vaspielt
und des wolln ma nid
dånkschea fi den schean transit
zum beispiel de lungaua echtleng
werdnt in portugal zählt und sortiert
und a frächter aus poln der muasas då holn
bevor er s nåch ostdeitschlånd führt
då werdnt se dånn gwåschn und gschnittn
und mit gen-soja gmischt und püriert
und am end ohne scheiß glei kubikmeterweis
nåch nordhollånd åbtransportiert
und in hollånd wecht nåchand des gånze
mit kuahmich aus englånd varührt
de suppn werdt gståmpft und zu pulver vadåmpft
und im tankwågn reimportiert
daraufhin werd des pulver im burgnlånd
vapåckt in an gelbn karton
und am end ohne schmäh lånds pürree in michee
ba da made in austria-aktion
transit transit.....
und mir führn lebendige viecha
va schottlånd bis in die türkei
de oan sågnt los zua: des is mårktwirtschåft pur
de åndern sågnt tierquälerei
transit transit.....
und so pump man vakehr auf de stråßn
und so produziern ma den stau
åba stått daß ma denkn und fåhrtn beschränken
forcier ma den autobåhnbau
und so schlågn ma hålt insare schneisn
ohne rücksicht auf mensch und natur
ållweil mehra und härter und schnella und breata
zuehren der transit-kultur
und so bau ma hålt weiter und weiter
und so spie ma des sisyphus-gspie
und in 10-15 jåhr is da stau wieda då
nur steahnt nåchand dreimål so viel
transit transit.....
und glei då hinta mein gåchtn
då rauscht und braust die A10
und mei kleansta da bernd huckt ban fensta und lernt
mit låsta bis 40.000 zähln
dass da EU-verkehslobby wurscht is
wia s de leit drei in zederhaus geaht
des is logisch åls wia - nur wås i nid kapier
is warum sie in sålzburg neamd wehrt
drum politiker, volkesvertreter
de wås dauernd van vollausbau rednt
trinkts wåssa stått wein - setzts a zeichn - ziagts ei
in a häusl entlång da A10
[nåchand kinnt s singa:]
transit transit.....